Ponimpunan Pituturanan Boros Id Kimaragang

Yoku nopo diti, nosusu oku nopo mimang ko baasa mogulu nopo norongow om nelaan ku, iri no reetan dot boros dang Momogun Kimaragang. Nga, pun pogi masam keno, ogumu i ot boros id Kimaragang ot aku orotiyan banar om aku i elaan kikiawi. Nanasib peti tu amu i landu dot aso telalaan. Addi, iti neti tu kakali i balajar sampai tidino nunu nunu it amu po nelaan. Om nunu nopo it nelalaan ku no mantad, nah, inono ot mangan ku polombuso sitid blog ku diti.

Mogulu po om, pentutun oku dikoo do kondiri ku tu madko ogumu tongo kinoruangan song duduat isai oku ma diti om nokuro ilo blog ku tiiso (Really Living) tu mimising ko boros dang urang putih nopo pakayon ku. Bah, maai ku diko'o patarango bo.

I tadau kinosusuon ku, minaan oku di todu ku puranganai i 'Mimie' tu agayo banar kabarasan it pingas ku dit ragang oku po. oh romimi banar ot pingas ka daalo..hehe. Nah, nunu po notimporon i diri tongo tulun om tongo kinoruangan mongiloow dogon do Mimie sampai tadau biano nga kasasalaan tu nolingan tobo doalo potulis sid surat beranak ku iti ngaran ku diti...hahaha.

Salapas dit agagayo no sabat om kararati oku no diri, natambaan diri ot pongilaan dot baasa ku tu kelo oku diri dot boros dang Bahasa Malaysia. Anong nokotimpuun no sumikul do sikula randa, kongko momoros no kelo nga monulis sid BM nga obubuli diri. Om natambaan nono kembagu ot baasa ku tu nokotimpuun oku diri balajar monulis om momoros id urang putih sabat-sabat. Padka om tiya dit sikula randa okukudik po ot orotiyan ku id baasa kumotolu diti, nah, mimang ko longkobuyon oku po id boros dang urang putih obo tiya diri. Nga sera nokosuang oku dot sikula menengah (Ting 1-3), i nopo tongo buuk pakayon dagai balajar dot BI, Matematik, Sains om Bible nga minaan udaro mantad ad Singapura om tinulis sid boros dang urang putih. Ai bo...tabpom notigagang obo it ginawo ku pupuun po sumikul do sikula menengah tu aso tororotiyan ku nunu it maan pajaro di guru ya. Madko nododoliyan oku tiya diri tu milom po tu balajar dot Matematik om Sains sid baasa do tulun suai. Jadi, mau tidak mau ka di Malayu...napajal oku diri babanar gumusa dit nelalaan di sandad ku wokon sid kalas tu madko opurimanan ku dot sinda oku po yoku seso molowong amu karati dot baasa inggiris. Nokotimpuun oku po dot gumusa doalo amu diri milo pengkoyodon it laang ku. Sino no tinimpuunon ku diri dot lobi ogumu mongitung saralom dot urang putih mantad baasa Kimaragang om BM.

Nawi ot Tingkatan 5 ku, minanambung oku sumikul silod UiTM om pengkhususan nopo nanu ku nga Bahasa Inggeris (TESL). Songo po, nodurunan diri ot sera nopo mongitung om monulis oku nga milom po tu baasa dang urang putih ot mimbulai ad pomusaraan ku. Najangan tobo iti sambil nendorosi okoi dit pensyarah dagai. Ino nopo ino it tadau di keeso okoi nogi sid kuliah, tinaakan okoi no mantad warning dit pensyarah dagai dot subai ko momoros, monulis, mongitung om monginipi nga sid baasa dang urang putih kikiawi. Addi madakat 5 toon oku misikul silo, aku insan monulis dang baasa wokon sumalak ko dang urang putih. Surat sinta ku di muula nga boros dang urang putih nopo kabarasan. Ades...aso i dara tujuan ku dot mokimoyo diti nga kuoyon po dino ong waro no monokod dogon dot oruwoon. Kukuro kukuro poma nga aku i olingan ot nontodon ku om ino no sabap yoku nga engin oku i dot sumokubang pembulai om popotilombus diti baasa bansa daton, Momogun Kimaragang.

Gisom no siti tuturan ku biano...ayanan oku no diri manaip. Pisosopan kembagu tu milom ababasan kou mambasa.

Blog Baru Suara Baru...

Blog ini saya khususkan untuk usaha pengembangan bahasa dan budaya kimaragang termasuk mengetengahkan cerita/tangon di gulu-gulu yang selalu nenek-nenek kita cerita waktu kecil kita. Jangan sampai ditelan zaman. Selain itu, cerita-cerita santai, jenaka dan kisah rakyat sekitar masyarakat Kimaragang juga sekali sekala akan diselitkan. Semoga dengan wujudnya wadah baru seperti ini, akan merancakkan lagi dunia kimaragang yang semakin terkikis identitinya di kalangan generasi baru. Tidak ada niat untuk mahu bersaing dengan blog-blog Kimaragang lain yang sudah sedia ada cuma sekadar ingin menjadi penambah rasa kepada apa yang sudah terlebih dahulu mengorak langkah ke hadapan. Bersama dan bersatu kita memperkasakan bahasa dan budaya Kimaragang. Salam kimaragang untuk kimaragang.